لعنة توت عنخ آمون.. بقلم إيهاب همام

لما نذكر لعنة الفراعنة على طول هنفتكر مقبرة توت عنخ امون ، بعد اكتشاف المقبرة ظهرت فكرة اسطورة لعنة الفراعنة ، لان بعد فتح المقبرة حصل حوادث غريبة ، تعالوا نتعرف على الحوادث دي..

في سنة 1922 تم اكتشاف المقبرة في وادي الملوك وكان مكتشف المقبرة هو عالم الاثار الانجليزي ( هوارد كارتر ) المقبرة كانت مليانه بالمجوهرات والاثاث الفخم. كمان ( كارتر ) اكتشف حاجة غريبة؟ عبارة منقوشة في جدار وكانت العبارة هي ( سيطوي الموت بجناحه كل من يُزعج الملك) !! ..
لما قرأ العبارة اصابته رجفة خوف لكن بعد كده اقنع نفسه ان العبارة دي مكتوبة لتخويف اللصوص مش اكتر ولا هي لعنة ولا حاجة.. لكن ( كارتر ) كان مخطئ لان بعد ما تم فتح المقبرة بدأت الحوادث الغريبة تحصل؟! كل من دخل المقبرة مات بطريقة غامضة!..

سافر كارتر للقاهرة لمقابلة اللورد كارنارفون ( عالم اثار مشهور ) عشان يتكلم معاه على مقبرة توت عنخ امون..

كارتر كان ليه مساعد اسمه ( كالندر ) كان حاطت العصفور الكناري بتاع كارتر في الشرفة ، في يوم افتتاح مقبرة توت عنخ امون سمع ( كالندر ) صوت استغاثة وانين جاية من الشرفة ، جري ( كالندر ) على الشرفة عشان يشوف ايه اللي بيحصل ، اول ماوصل للشرفة وقف ( كالندر ) مخضوض من المنظر اللي شايفه؟ كالندر شاف العصفور الكناري محاصر بافعى ضخمة وبتمد لسانها داخل قفص العصفور! بسرعة كالندر قتل الافعى لكن ملحقش العصفور لان الافعى قتلته! .. الملفت في الحادث ده ان فوق تمثال توت عنخ امون افعى كوبرا !! واللي شافه كالندر افعى كوبرا!..

من اكتر الحوادث خوف وغرابة في ليلة فتح المقبرة
مات شخص اسمه ( محمد زكريا ) واحد من اللي استطلعوا مكان المقبرة مع علماء الاثار ، مات نتيجة لاصابته بحمى مجهولة في منتصف الليل بعد ما رجع بيته!.. وفي نفس اللحظة اللي مات فيها التيار الكهربائي انقطع عن القاهرة!..
في احصائيات بتقول ان في اكتر من 40 عالم اثار ماتوا بعد دخولهم المقبرة بايام قليلة!..

كمان اللورد كارنارفون كان من الضحاية؟ بعد ما دخل المقبرة لسعته بعوضة جوه المقبرة ، بعد كام يوم من فتح المقبرة كان اللورد كارنارفون بيحلق دقنه ، وهو بيحلق اصاب مكان اللسعة بالموس وده ادى الى تمزق اللحم وتسسم في الدم وفي النهاية مات!..

لحسن حظ ( كارتر ) محصلوش حاجة زي ما حصل لكل من دخل المقبرة ، لكن مات السكرتير الخاص بيه منتحر بدون سبب ومات والد السكرتير حزنًا على ابنه! و اثناء تجهيز جنازة السكرتير ، داس الحصان اللي هيجر التابوت طفل صغير فقتله!..

ايه بقى تفسير الحوادث اللي حصلت دي ؟ هل فعلا ليها علاقة بفتح المقبرة ولا مجرد صُدف مش اكتر؟!
في كذا تفسير اتقال عن حوادث موت العلماء اللي دخلوا المقبرة ، تفسيرات بتحاول تحل اللغز؟!

اول حاجة اتقالت ان مقبرة توت عنخ امون بقالها الاف السنين مقفولة ، فالهواء اللي خرج من المقبرة هواء ملوث ، فلما المقبرة اتفتحت اصاب كل اللي دخلوا المقبرة بتسمم فماتوا نتيجتها ، او ان حصل هلاوس مثلاً خلت اللي ينتحر ينتحر واللي يموت بالحمى وهكذا ..

تاني تفسير ان المقبرة كانت محمية بتعاويذ وسحر فاي حد يحاول يدخلها تصيبه اللعنه اللي اترصدت بيها المقبرة!.. وطبعا كلنا عارفين ان القدماء المصريين كانوا افضل سحرة ..

اخر تفسير بيقول ان تم زرع فطريات قاتلة داخل المقبرة ومع مرور السنين انتقلت للهواء ف ادى لتسمم الهواء ، تم اجراء تجارب على تابوت المومياء واكتشف فيه مواد عالية من الفورمالدهيد والامونيا و كبريتيد الهيدروجين ، كل المواد دي عبارة عن غازات سامة جدا