حكايات العالم السفلى.. الحكاية الثامنة عشر

بقلم /إيهاب همام
التليفون مغلق

منذ يومين كنت جالس فى مقهى جوار المنزل، هاتفنى ابنى من خلال تليفون والدته، سألنى انت فين يابابا؟

اندهشت من السؤال، انا كنت لسه خارج من البيت، المسافه قريبه جدا، يعنى ملحقتش اختفى، كمان هو كان مع والدته عند مامتها ومتوقعتش انهم رجعو ، قولتله انا فى القهوه هرجع بعد نص ساعه، فيه حاجه؟
كان رده لا

بعد نص ساعه بالظبط كلمنى تانى، انت فين يابابا؟
قلتله فى الطريق راجع، قال ماشي وقفل الخط

وصلت الشقه فتحت الباب وروحت على غرفته على طول لقيته نايم
بصراحه انصدمت
لسه كان معايا على التليفون، ولأول مره احس بالرعب لأن فيه ناس قالتلى البيت مسكون
صحيت ابنى من النوم هو واخته بينامو فى غرفه لوحدهم بعيد عن مامتهم ، بلطافه سألته، انت ينفع تتصل بيه وتجبنى من القهوه وتنام؟

اتصل بيك ايه يابابا انا مقمتش من النوم اصلا

من ورايا على باب الاوضه سمعت انا الى اتصلت بيك
بلف لورا لقيت مراتى

كنت عارف انها نايمه فى الاوضه التانيه بعيد عن الأطفال

قلتلها دا انتى صوتك بقى ناعم جدا، تصدقى افتكرتك أدهم ابننا؟
كنت بهزر طبعا،

قالت أدهم مين؟
أدهم ابننا يا فاتن؟

سلامتك يا رمزى ابننا اسمه مدحت

لحظتها قعدت ابص فى مراتى بتأكد انها بتهزر

فاتن كفايه هزار انتى وادهم انا عارف ان أدهم كلمنى

أدهم مين يابابا انا مدحت

وطلع الولد راسه من تحت البطانيه

ليلتكم سوده، كفايه هزار بقا

بتكلم مين يا مدحت فى الاوضه الفاضيه انت اجننت؟

دا كان صوت مراتى، بصيت لمراتى إلى قدامى وزعقت فيها
انتي جايبه مين معاكى من خواتك لان صوتهم متشابه
كفايه هزار بقا

وسعت شويه لحد ما قدرت اعدى ومشيت ناحية الغرفه التانيه ومراتى ماشيه ورايا

لقيت مراتى نايمه على السرير

بصيت للست إلى معايا إلى هى مراتى اصلا والست الي نايمه على السرير وجسمى كله قعد يرتعش

عايز اعرف مراتى الحقيقيه لان عرفت ان فيه عفريت،
والى كانت نايمه على السرير كانت خايفه ومرعوبه وفاتن خوافه اصلا ربنا الهمنى وقعدت اقول اعوذ بالله من الشيطان الرجيم واقراء قرأن
واحده فيهم اختفت

قلت الحمد لله بكره ان شاء الله لازم اجيب شيخ يطهر الشقه او نسيب الشقه خالص

مراتى كانت مرعوبه، قعدت أهديها اكتر من نص ساعه، نمت جنبها ونسيت الأطفال، مش عارف ازاى عيني غمضت

نص الليل وتليفونى رن، مكنتش هرد بس لقيته رقم مراتى

فتحت الاتصال لقيتها بتقول نمت يا حبيبى؟

حاولت اتصل بيك اكتر من مره اقلك انا هبات عند ماما لكن تليفونك كان مغلق.