وإيه الداعي.. ياسمين حافظ

وإيه الداعي
أموت فعلًا
وأسيب نفسي للفكرة
ماهي مش جاية من مرة

دي جاية من ضغطة ورا ضغطة مره
وليه أعيش بقلب ضعيف
وأنا الأزمة سوتني
وهدتني وقوتني
وصعب أعيش بقلب خفيف

يخاف من لحظة مره
بعد ما اتألمت كذا مرة
ده حتى عيب
ولو ع الحق أطول بالي
ولو بالزق… أكمل حالي ومشواري

بس ما اسيبش نفسي
لأفكاري ومراري
ولا أنهي روحي بإيدي
وأضيع حقي واختياري

ولازم أعيش ولو بالزق
ما أنا برضو ليا رب لطيف
ساندني في خوفي وضعفي
وعمره يوم ما ضيع حق

شايفني وعالم بيا
وبكل عزم جوايا
هقوم تاني ….. من تاني
وأكتب نهاية تانية ليا
يمكن في لحظة واحدة

تتغير كل الحكاية
وتتبدل كل أحزاني
وتروح أوهامي معايا
وايه الداعي أموت فعلًا

وفي ناس قبلي اتوجعت
وعانوا أكتر ما فيا
لكن قامت وما وقعت

وبقت حكايتهم نور
في عتمة أي إنسان
رمز لقوة وصبر
لكل قلب كان تعبان ……..