ياعيد..لاتجي.. بقلم هناء عباس العباس

ياعيد لاتجي
لسا الروح حزينة
والقلب مدبوح
عم يرقص بلا دف..ولا غني

لبس الفرح تيابو السود
وسكتت ضحكة البيوت
وعالشباك رفرف يمام الشوق
وبقيت ريحة الغياب على قميصي

بس هلق ياعيد
إذا مرقت من بيتنا
لاتفيق الحنين وتنبش الذكريات

خلي الجراحات دفينة
ياعيد…
بحق دمعة يتيم
نامت على خدو وما حدا مسحها

بحق شهقة ختيار
واقف عالباب…ناطر خطى ولادو البعيدة
بحق قلب ام
تمسح صور ولادها عالحيطان

ودمعتها سخية
لاتجي..
بالله عليك لاتجي
خلي الليالي طويلة

يمكن يجي نهار
وترجع هالضحكة الجميلة.

هناء عباس العباس