خالد كامل يكتب.. “صديقي الحمار”

كنت في زيارة سريعة لاجمل بلاد الصعيد إلى قلبي وأحبها الي نفسي وبيسموها برضه عروس الصعيد محافظة “المنيا ” وانا ماشي كده في الغيط ساعة العصاري بصيت من بعيد لقيت حمار ابيض ماشي لوحده ومن غير صاحب وشكله

زي العسل وهادي كده وكيوت ………قربت منه وفضلت امسح بايدي علي قفاه

ياحرام حسيت وكأنه محتاج شوية عطف وحنية قربت من ودانه الطويلة وفضلت اوشوش فيها لقيته مبسوط ومش معترض ……وكان ليه مزاج اني اتكلم معاه وافتح معاه مواضيع مش قادر افضفض فيها مع البشر اللي أصبحوا اكثر عدوانية من الطيور الجارحة والحيوانات المفترسة في الغابة .. فضلت اقرب من ودانه شوية بشوية..ودار بينا هذا الحوار الافتراضي ..

“سالت الحمار الغلبان ايه رايك في البشر ياحمار ؟؟؟؟

*رد الحمار وقال : البشر دول اسوء المخلوقات دايما كل ما يشوفوا خلقتي تلاقيهم ضرب واهانه وشتيمة زي مايكون الحمار ده اتخلق علشان يشتموا فيه عمال علي بطال ..

“سالت الحمار وبيحصل كده ازاي؟؟؟

*رد الحمار وقال : انت مش بتشوف بعينيك لو واحد عمل اي حاجة مش بتحبها الناس ولا بتعجبها يقوم يقوله ياحمار…

ولو اي تصرف مشين ولو صغير يحصل من البشر مافيش غير أنه يتشتم …ياحمار …

حتي الاغبياء منهم ف..الشتيمة الطبيعة لوصف الغباء هي .. ياحمار ..

بذمتك ياحضرة المحترم احنا كده بذمتك ..

عايز اقول لسعادتك أن احنا الحمير عمرنا ماكنا اغبياء

احنا بنشتغل وبنتعب من غير كلل أو ملل وبنفهم ولينا مشاعر زيك بالظبط..

وعايز اقول حاجة مهمة لازم تعرفها

*فيكفينا فخراً أننا حمير*

*لا نــكـــذب*

*لا نـقـتـــــل*

*لا نــســـرق*

*لا نـغـتــــاب*

*لا نــشــتـــم*

الصراحة كلام الحمار عجبني قوي وكان منطقي

وحسيت اني بتكلم مع سقراط أحد فلاسفة اليونان القدامي أو تلميذة النجيب أفلاطون

بصيت للحمار لقيته معجب جدا بنفسه ..

ووقف ورفع رأسه لفوق في منتهي العظمة زي خيل السباق

وراح فقعني حتة عبارة..

وكان نصها بالحرف الواحد ..

*سأبقى أفتخر أنني…… *حمار ابن حمار*

ثم اكون ترابا ولا أدخل النار التي وقودها الناس والحجارة..