ليه كل النجوم بينجذبوا لدينا الشربيني؟!
الكاتبه الصحفيه: شيرين عصام
في الأيام الأخيرة السوشيال ميديا مولّعة بتحليلات غريبة: ليه النجوم بينجذبوا لدينا الشربيني رغم إنها مش أجمل ست؟
سؤال بيتكرر وكأنه سر كوني محتاج تفسير علمي، مع إن الحقيقة أبسط من كده بكتير.
أنا عندي رأي يمكن مايعجبش ناس كتير، بس هو الأقرب للواقع.
دينا الشربيني مش مختلفة عن “الراجل الجذاب الشقي” اللي البنات دايمًا بتسأل: هو ليه كل البنات بتحبه؟!
الإجابة واحدة عند الاتنين:
لأن عندهم القدرة إنهم يخلوك تحس إنك محور الكون، وإنك أهم شخص في حياتهم.
الاهتمام المبالغ فيه، الحنية، السؤال الدائم: روحت؟ أكلت؟ ناقصك حاجة؟ مين زعلك؟
ده اسمه الاحتواء يا سادة…
بس في الحقيقة هو احتواء كاذب، بيختفي أول ما العلاقة تبقى رسمية، ويتحول للتلاسن والتلقيح، وتختفي الحنية زي ما عمرها ما كانت.
وتبدأ الحكاية تتكرر… دينا تبقى زينة، وزينة تبقى جمالات، وأحمد يبقى هشام، وهكذا.
اللي عمله الفنان كريم عبد العزيز في اختياره حر تمامًا، وحقه الطبيعي، وزوجته في المقابل تقبّلت الموقف بطريقة ناضجة وشرعية جدًا.
لكن اللي عمله الجمهور هو اللي يستحق الوقفة:
تطفل، وانتهاك خصوصية، وتحليل حياة ناس كأننا أوصياء على قلوبهم!
هل حد فيكم يعرف زوجته بتعامله إزاي بعد قصة حب ملتهبة وزواج طويل؟
بالنسبة له، دينا قمر لأنها فهمت احتياجاته واحتوته وماشية على موجته.
أما إحنا فشايفينها “مش جميلة”!
بس الجمال نسبي يا جماعة…
فيه راجل مش وسيم بس جذاب بتصرفاته، محترم، صاحب موقف، وبيتحمل المسؤولية.
وفيه ست مش ملكة جمال، لكنها نضيفة، متفهمة، قنوعة، وفيّة، بتسند الراجل بجد.
دول هما اللي فعلاً ست الستات ورجالة بجد.
فبلاش نرمي دينا الشربيني بالباطل،
ونسيب بطل القصة اللي اختار بإرادته،
ونسأل نفسنا بكل بساطة:
إحنا مالنا؟ الله يكرمكم…
