هو ممكن يحصل جواز بين الإنس والجن؟
بقلم الكاتب /إيهاب همام
السؤال ده كتير منا سالوا.. لكن قبل ما نحاول نجاوب عليه خلينا الأول نعرف حاجة مهمة وهي ان طبيعة الجن مختلفه عننا.. يعني الجن مخلوق من نار.. وسيدنا آدم مخلوق من طين.. فالطبيعة التكوينيه مختلفه… لكن احنا اه مخلوقين من طين.. بس احنا دلوقتي طين؟ لأ طبعا احنا بني ادمين من لحم ودم وبناكل ونشرب وحتى لو حد ضربك ب قطعه كبيرة من الطين حجر طيني هتتالم منه.. ولو انت طين فالمفروض ماتتالمش لانه انت منه!.. ونفس الشيء ف الجن هما من نار بس طبيعتهم مش نار بيكلو عادي ويتجوزو..
كده عرفنا الفرق بين الجن والأنس..
طب هو ممكن يحصل جواز بينا؟ بصو كتير من العلماء قالوا أن ده ممكن يحصل بس جواز مش بشكل مباشر .. يعني ف آية ف القران بتقول ( ويشاركم المال والاولاد ) وهنا الاية بتتكلم ان الجن والشياطين بيشركونا ف المال .. والاولاد هنا اللي قال ان ممكن يحصل زواج بين الانس والجن استدلوا ب الاية دي وقالوا ان الجن هنا بيتجوز من الانس بطريقة مش مباشرة وهي لما يحصل علاقة محرمه زي الزنا مثلا.. بيطلع الطفل اللي من علاقة محرمه لما بيكبر يعني بيكون شخص ميال للمعاصي والاعمال الشيطانية لان ولادته جت نتيجة مشاركة ابليس نطفة الرجل ف علاقة محرمة.. وبرضه لما الرجل ياتي زوجته بس بطريقة غير شرعية.. الاطفال مش بيكونوا صالحين ودايما افكارهم مياله لوسوسة الشيطان والمعاصي!..
الطريقة بقى المباشرة مش هتحصل غير بطريقة واحدة بس ولازم يحصل تشكل للجن.. الجن معروف انه بيتشكل ف اشكال كتير ومش بيظهر ع شكله الحقيقي.. فعشان يحصل زواج من جنيه لرجل لازم تتشكل ف بنت.. والعكس صحيح رجل يتشكل لبنت عشان يتجوز منها!…
وف قصة عن الامام مالك ان جاله رجل بيسالو هل يجوز للرجل ان يتزوج الجنية؟ فسكت ولم يجب الامام.. ثم في مجلس خاص سئل نفس وقال له الرجل ليه لم تجب؟ فقال الامام مالك: يجوز.. لكن اخشى ان تاتي المسلمة حاملا من الزنا.. وتقول تزوجني جني وحملت منه!..
في قصة مشهورة حصلت في زمن عمر بن الخطاب رضي الله عنه والقصة بتقول ان رجل من الانصار خرج يصلي مع قومه العشاء.. فغاب فترة وزوجته دورت عليه… فقالت زوجته أن الجن خطفه! وراحت لسيدنا عمر وقصت عليه القصة.. فسأل عمر أهل الرجل ده عشان يتأكد من القصة فقالوا أيوة خرج يصلي العشاء وغاب.. فأمر سيدنا عمر الست دي أنها تفضل منتظرة زوجها اربع سنين ولو مرجعش تجيله تاني.. فضلت منتظرة اربع سنين وجت لسيدنا عمر وقالت له ان زوجي لم يعد.. وسيدنا عمر راح يتاكد من قوم الرجل ده فقالوله فعلا مرجعش.. فامر الست دي انها تتزوج واتجوزت فعلا…
وبعد فترة رجع جوزها الغائب لسيدنا عمر واختصه فقال له عمر انت غيبت زمن طويل ولا احد يعلم مكانك… فقال الرجل لي عذري؟ وبدا الرجل يحكي له ان الجن خطفه وهو راجع من صلات العشاء ولبث فيهم زمن طويل لحد ما حصلت غزو للقبيلة اللي خطفته وهي كانت جنيه عشقته.. الغزوه اللي حصلت دي كانت من جن مسلم وغلبوهم واخدوا منهم سبايه كتير وانا كنت من السبايه دي.. ولما لقيوني مسلم ماذونيش وخيروني بين ان افضل معاهم او ان ارجع لاهلي.. فاخترت ان ارجع لاهلي… فمشيو معاه الجن عشان يوصلوه لداره.. فبيقول ان طول الليل محدش بيكلمه من الجن.. وفي النهار ريح شديده كنت بركبها معهم لحد ما وصل ف الاخر…. وسيدنا عمر خيره بين ان يرجع لزوجته او يتركها…
ده حديث مشهور واغلب العلماء قالوا انه حديث صحيح….
حكايه لصياد خرج كالعادة يصطاد لكنه مرجعش واهله اعتبروه انه مات ف البحر! واخده عزاه.. لكن بعد سنه فجاة ظهر واهله كانوا مصدومين.. وهو حكالهم ان طلع له بنت جميلة جدا وحبته وعاش معاها في مدينه تحت البحر.. لكنه اشتاق لاهله وقال للبنت عايز ارجع لاهلي.. وافقت لكن بشرط ان بعد اسبوع يرجع لها والا هتاذيه! فعلا بعد اسبوع كان هيخرج للبحر عشان يرجع للبنت الجنية.. بس ابوه رفض وقال له مش هتقدر توصل له هي ف البحر وانت بينا … لكن بعد ايام جاله طرد وكان ف خنجر شكله عجيب ومنقوش عليه كلمات غريبة! بالجنجر ده اهل الشاب لقي الشاب مرمي ع الارض ومغروس ف جسمه الجنحر! مات بيه!….
قصه اخيره لبنت كانت جميلة جدا وكانت محجبه ومحترمه جدا.. واهلها متدينين.. لكن ف يوم كانت قاعده ف البلكونه بليل.. وفجاة وهي قاعدة شافت خيال واحد طويل اوي.. هما ف الدور التاني.. وخيال الحد ده واصل للدور التاني.. البنت شافت بعدها شاب جميل بس طويل اوي! خافت وصرخت وجريت ع امها تجكيلها! امها قالت اكيد متهيالك… بعدها تاني يوم بليل شافت ست عماله تسرح شعرها الطويل جدا ف نص الشارع بليل! خافت برضه وجريت ع امها…
من بعد الموقفين دول والبنت حالها اتغير.. قلعت الحجاب وبقت تلبس لبس ديق اوي.. وتسمع اغاني.. وترقص عليها ف الاوضة.. ودايما واقفه قدام المريا تسرح شعرها وترقص… امها كانت تضربها وتشتمها.. واخوها الكبير برضه وهي ع نفس الحال.. ودوها لشيخ وقالهم ان البنت عشقها جن وعايزها لنفسه وهو اللي بيوسوسلها تعمل كده!… بيجهزها عشان يتجوز منها عايزه واحدة مش محتشمه ومش محجبه وتسمع اغاني عشان يقدر ياخدها زوجه ليه!…
بقلم/إيهاب همام
