خليك جريء.. بقلم أمل أمين الخولي

إوعاك تغيب ولَّا تخاف
أو حزن قلبك يتكِشف
إياك تبان دموع عينيك
والحيرة ليهم يوم تتشاف

خليك قوي
خليك شجاع
مهما يقولوا بلاش تكِش
أو من عيونهم تستحي

مين كان بريء؟
ولَّا مين ف يوم
كان لك صديق؟

الكل بايع وبيتباع
بيعيبوا فيك علشان غلطت
وبيدبحوك لمَّا ضعفت

ويجرحوك لمَّا انهزمت
عادي وماله
ده ف قلوبهم يا ما شالوا
من الأذى أشكال وأنواع

مش مهم إيه بدايتك
المهم .. تبقى قصة
وتتحِكى دايمًا حكايتك
يحكوا إنك كنت آه

وبعدها
كنت للكون راحته و دواه
ويقولوا ياما وياما ياما
بس النهارده

إنت ماشي ف الطريق
لحد ما يبان منتهاه
سيبهم وكمِّل سكِّتك
متخافش منهم
العمر واحد
ده مبتغاك ودنيتك
من غير وداع

سلِّم وفارق
وإوعاك تخاف
إلا من الله