عادي.. بقلم ولاء شهاب

كنت بترد الصباح
وتقول صباح الفل
كنت تستني رسالة
بمنتهي السعادة
بسرعة ترد ..

ويا ما قولت ماتزعليش
اسف لو اتأخرت في الرد…
كنت وكنت وكنت
ودلوقتي بعد ما هنت

بقي الصباح رده عيب
واللي يزعل
يضرب دماغه
في اتخن حيط ..

آه يا مية ندامة !!
بقي رد السلا م عيب
وكسر الخواطر عادي ؟!

أسفة يا اخينا
انت بني آدم مزاجي ..
تقتل القتيل وتمشي
في الجنازة ..

ده الصباح لله
والمسا لله
واحنا بني آدم ضعيف
تايه بيتمني يلاقي

امانه في الحياة
فيها ايه لما تجبر الخواطر
وتراعي خلق الله ؟!
لما تحب تسيب وتمشي
امشي .
عادي عادي .
الحياة مكملة في طريقها
هي امتي وقفت عند حد ؟ !

بس ما تسيبش
وراك جرح واذية
علاجها مستحيل
و صعب …..

ولاء شهاب