شعبان ثابت يكتب.. (دردشة مصاطب)
أصدقائي وقرائي الأعزاء كتبت كثيرا عن أعباء الزواج وغلاء الأسعار الذي يواجه الشباب هذه الأيام ولكني اليوم أقدم لكم حوار ودي على غرار حوار المصاطب زمااااان
واحد صاحبي جاء لزيارتي ما هو أنا أصحابي كتير بس ع الفيس وإللي بيزوروني قليل ما علينا
قال لي :
يا أستاذ مسمعتش ولد فلان الفلاني هيتزوج بت فلان الفلاني قلت له مبروك ربنا يتمم على خير
قالي :
بس في مشكله ليه خير إن شاء الله؟؟؟
قال لي :
أبوها عايز 100 جرام دهب إيه بتقول إيه هو في حد بيجيب دهب اليومين دول يطلعوا بكام دول طلعنا الحسابه وقعدنا نحسب طلعوا بألفات ملهاش عدد
قال لي :
ياريت على كده وبس دا عايز عفشه من دمياط؟؟
ليه مالها (طهطا) ما هي رخيصه ومعظم الناس بتجيب منها ولادول مش بني آدمين ماهم بيتزوجوا ومستورين الحمدلله
قال لي :
أهو ده إللي حصل وياريت على كده وخلاص دا لازم (روكنه) فخمه إيه بتقول إيه إيه الروكنه دي مكنتش على أيامنا كان كلها كنبتين وخلاص.
إنسى يا أستاذ الدنيا تغيرت طيب يا عم أنا موضه قديمه وإيه كمان قال لي :
عايز أوضه أطفال ليه هي العروسه معاها عيال ضحك وقال لي :
عيال إيه بس يا أستاذ دا لازم يجيب أوضة الأطفال كل الناس بتعمل كداا إنت مش عايش في الدنيا ولا إيه؟
ضربت كف على كف وقلت طب مش لما ييجوا الأطفال يمكن تكون الدنيا تغيرت والاوضه تبقى موضه قديمه.
قال لي :
ولسه السفرة سفرة إيه دي مالها الطبليه دا حتى الراجل المحترم الشبعان بنقولوا عليه متربي على طبلية أبوه طلعت وحشه الطبليه دلوقتي آه آه يازمن؟؟
وبعدين يا صاحبي قال لي :
وعايز صالون فخم برضه من دمياط دا غير النيش طبعاً زي ماأنت عارف إنت هتقولي على النيش دا من غيره جوازه مفيش.
وإيه عايز نيش فاخر أومال إيه وإيه كمان؟
دا غير الرفايع التانيه رفايع إيه دي كماان تاني؟
قالي دي حاجات كتير كده مكنتش على أيامكم يوووووووه كل ما أكلم واحد يقول لي مكنتش على أيامكم مالها أيامنا ماكنا مرتاحين ومبسوطين وأقل جوازه بتدوم سنين هو الطلاق كتر من قليل يا عالم يا مجانين!
قال لي :
إنت بتقول فيها ماهي العركه منصوبه
دا أنا مقلتلكش على التقيلة إيه تاني ربك يعديها مستوره أبو العروسه عايز قايمه بمليون جنيه
وإحتمال الجوازه تبوظ ليه بعد الشر ما الناس تتساهل مع بعض وتراعي ظروف بعض أهم حاجه الحب والود والتفاهم إرحموا بعض وبلاش كل واحد يبيع ويشتري في التاني خلوا المركب تسير وربنا يسعد أولادكم وبناتكم ويخلفوا لكم صبيان وبنات ويخلوكم أجداد.
ويديم علينا وعليكم الأفراح وبعدها إستأذن وسابني ومش عارف الجوازة تمت ولا لأ
وإلى أن نلتقي في مقال آخر أترككم في رعاية الله وحفظه.
