بلاش تبكيني.. بقلم أمل أمين الخولي

بيسألني
لوعمري انتهى وعدَّا
وغابت شمسي وسنيني
شوقك ليَّا راح يهدا؟
وممكن تنسي أحلامنا؟

وكلامنا؟
وخصامنا؟
ويمكن تنسي تدعيلي؟

وتنسيني؟
قلبي اتهز جوَّايا
ودمعي ف قلبي صار بركان
وحسيتني بموت م الخوف

ولا عاد عقلي بيفكَّر
ولا كان ليا أي كيان
وشوقي لهيب بيكويني

وقلقي عليه مع حنيني
مصبرني وحيَّرني
ووعد وعهد كان بيننا
دايمًا جنبه يلاقيني

أقولك إيه
وإنت حِتة من روحي
يا كل سعادتي وجروحي
يا عِز مُنايا وشقايا

يا عِلِّتي برضه ودوايا
لو إنت تروح
راح أعمل إيه؟!
وأنت ليَّا نور عيني
بلاش توجعني

ده أنا دعيتها
أفارق دنيتي قبلك
وبإيدك تغطِّيني
ف بلاش تسألني
وتقولِّي هتفتكري

ولَّا ف لحظه تنسيني !
بلاش بالله
بلاش بالله تبكِيني