الإحساس بالأمان أهم من الحب.. بقلم مريم أبو السعد

الإحساس بالأمان و الراحة أهم بكتير من الإحساس بالحب .. انك تكون مطمن ومش خايف .. انك تحس ان اللي قدامك مضلل عليك . محاوطك من كل ناحيه .. حتي لو مش جنبك حقيقي .. بس حاسس بروحه حواليك .. حاسس بعنيه بتبص عليك وتحميك .. حاسس بايده و هي بتطبطب عليك في عز لحظات وجعك وخوفك .. إحساس اشبه و اقرب للامومة او الابوة منه للحب العادي او المتعارف عليه ..

ومن وجهة نظري ان الإحساس دة أحلي واهم بكتير من الحب العادي .. تلاقي نفسك بين ايديه علي طبيعتك .. مابتتكسفش تبين ضعفك و دموعك قدامه .. بالعكس
دة انت بتحس انك محتاج تكون كدة قدامه هو بالتحديد ..
بتحس أول مابتشوفه ان روحك بتهدي و قلبك
بيطمن ويرتاح بتحس أنك عايز تجري ترمي نفسك في حضنه .. عايز تفضل ماسك ومتبت في ايده ..

أنت في الأول و الأخر بشر .. بتحس و ليك طاقة و ليك قوة تحمل .. ما ينفعش تبقي طول الوقت واقف علي رجلك و حامي الكل و ساند الكل .. طيب ما هو انت كمان محتاج اللي يحميك و يسندك .. محتاج اللي يحتويك و يستوعب ضعفك من غير ما يستغل الضعف دة .. محتاج اللي ترمي همومك بين ايديه عشان تقدر تكمل وتشيل هموم غيرك ..

والشخص اللي انت ممكن تلاقي نفسك معاه بالشكل دة
مش بتلاقيه بسهولة .. ممكن تصادفه في العمر مرة ..

وممكن ماتصادفوش خالص .. بس لما بيحصل و تصادفه و تلاقيه بجد .. بيكون هدية من ربنا ليك .. كأن ربنا بيعوضك عن كل التعب اللي انت شوفته في حياتك .. و بيكافئك علي تحملك و صبرك و عطائك للاخرين حتي و لو علي حساب نفسك .. بيبعتلك اللي يفضلك علي نفسه .. زي مانت فضلت الكل علي نفسك .. بيبعتلك اللي يحبك و يخاف عليك و يحتويك ويمد ليك ايده … زي مانت خايف عالكل و شايل هم الكل و مادد ايدك بالمساعدة للكل ..

عوض ربنا مافيش احلي منه .. وربنا طول الوقت بيبعتلنا رسايل ويعرفنا أن مافيش حاجة بتضيع ابدًا ..

سواء خير أو شر .. ربنا يعوضنا ويرزقنا جميعا بالناس اللي تكون لينا الأمان  والراحة في زمن كله وجع.