حكايات العالم السفلى.. الحكاية الخامسة عشر

بقلم إيهاب همام
ساعة الحظ

قاعد مع أصحابي في كافيه قلت لهم امبارح فتحت الفيس لقيت مسدچ جاتلي من بيدچ اسمها
[ساعه الحظ ما تتعوضش] قبل ما اقرأ الرساله دخلت على البيدچ وكانت خاصه بالتعارف بين الجنسين لكن الغريب في نص الرساله انهم عرضوا عليا كام صورة لكام بنت وتحت كل صورة مكتوب الاسم وطلبوا مني اختار بنت منهم واتعرف عليها والاغرب بقي ان لما اخترت بنت لقيت رساله آخري بيبلغوني فيها ان يوم الأربعاء سيتم انتهاء العرض واليوم التالي ستقام حفله التعارف وبعتوا ليا العنوان

أصحابي اتحمسوا للفكرة وبعد محايله منهم وافقت
ابعت ليهم لينك البيدچ علشان يلحقوا يسجلوا في العرض ويحضروا الحفله خلصنا سهرتنا واتفرقنا

رجعت للبيت اتصفحت شويه علي الانترنت وتاني يوم نزلت للشغل وهناك قابلت اصحابي لقيتهم مبسوطين وفي قمه سعادتهم قالولي تسلم يامعلم انت صاحب جدع سجلنا في الحفله يامعلم وهنحضرها سوا وهتبقي خراب وبدأ كل واحد منهم يوصفلي شكل البنت اللي اختارها وقد ايه مبسوطين انهم هيقضوا سهره جميله ويرتاحوا من نكد زوجاتهم المتكرر يوميا قلت لهم بس ياجماعه البيدچ دي شكلها كده بتعمل الحفله اسبوعيا ف احنا نحضر المره دي ونجرب
لو الموضوع عجبنا ومطلعش حوار هنكمل فيه اشطا

خلصت شغلي ورجعت للبيت اليوم عدي بسرعه والحقيقه كنت متحمس جدا لليوم التالي اللي هتقام فيه حفله التعارف

يوم الخميس وانا في الشغل لقيت اصحابي قالولي ان البيدچ بعتت لهم مسدچ بتبلغهم ان تم تأجليهم للحلفه التي ستقام الأسبوع المقبل قلت لهم خلاص مش مشكله عادي تتعوض المره الجايه يا رجاله فتحت الفيس وبعتت مسدچ للبيدچ علشان استفسر عن حضوري في حفله اليوم ولا تم تأجيلي للحفله القادمه زي ما حصل مع اصحابي

لقيت البيدچ بعتت لي مسدچ بتبلغني انهم اختاروا عدد معين لحضور حفله اليوم وكنت انا من ضمنهم الحقيقه فرحت جدا لكن محبتش اعرف اصحابي باللي حصل وبلغتهم ان جاتلي رساله زيهم اني اتاجلت لحفله الاسبوع القادم

بعد نهاية شغلي رجعت البيت خدت شاور وغيرت هدومي ونزلت ركبت تاكسي و وصلت لمكان الحفله
كانت شقه في عماره في منطقه هاديه
دخلت الاسانسير وضغطت علي الزرار السابع
عدت ثواني سريعه وخرجت خبطت علي باب الشقه رقم 21 سمعت صوت بنت بيتكلم وبتطلب مني اعرف نفسي وجاي اقابل مين ؟ قلت اسمي واسم البنت اللي جاي اقابلها

لقيت البنت اللي بتكلمني قالتلي ثواني
الباب اتفتح وظهر بنت جميله جدا سلمت عليا ورحبت بيا دخلت وقعدت قدمت ليا عصير
بصيت حواليا ملاقتش اشخاص غيري
قلت لها هو مفيش حد هنا ولا ايه
قالت لي لا يافندم في ناس هتحضر لكننا عاملين فاصل زمني مدته ساعه بين شخص والتاني منعا للتزاحم
وان كل فرد ياخد راحته
ابتسمت وقلت لها جميل جدا طيب ايه النظام بقي
قالت لي حضرتك دلوقت الحفله بدأت
مطلوب منك تدخل التلات اوض الموجوده هنا
وكل اوضه هتقابل بنت وتنفذ طلباتها
قلت لها تمام

قومت دخلت اول اوضه لقيت بنت جميله جدا شعرها اصفر وعينها خضرا وكانت لابسه كاش مايوه لكنها محبوسه في قفص زجاجي لقيتها بترفع ايدها وبتظهر ورقه مكتوب فيها مسأله حسابيه تكاد تكون معقده ولقيتها بتقولي لو قدرت تحل المسأله دي خلال دقيقه هخرج من القفص
ولو مسكتني اعمل معايا اللي انت عايزه

الحقيقه حاولت احل المسأله وافكر فيها كتير لكن للأسف معرفتش لقيت البنت بتقولي للأسف وقتك انتهي
لكن متزعلش ليك فرصتين

خرجت من الاوضه الاولي ودخلت الاوضه التانيه لقيت بنت لابسه هوت شوت وتيشرت كات بيتهيألي ماشوفتش في جمالها شعرها وعيونها وضحكتها خطفت قلبي بجد
ابتسمت وقالت قدامك سبع حواجر خشبيه لو قدرت تكسرهم في اقل من دقيقه ومسكتني اعمل فيا اللي انت عايزه

افتكرت افلام الاكشن وتقمصت دور ڤان ديزل وبقيت بكسر في الحواجز الخشبيه لكن كل حاجز كان بيزداد حجمه وقوته عن الحاجز اللي قبله وقبل وصولي للحاجر الاخير
لقيت البنت بتقولي للاسف وقتك انتهي
لكن متزعلش ليك فرصه اخيره

خرجت من الاوضه وانا متضايق جدا ومتعصب ودخلت الاوضه الثالثه والاخيره لقيت بنت واقفه وضهرها ليا شعرها ناعم وطويل وكانت لابسه لانچيري وماسكه في ايدها
صاعق كهربائي لقيتها بتحرك جسمها للخلف ببطء
وبقي وجهها مقابل لوجهي

بلعت ريقي بالعافيه وحسيت ان جسمي بيترعش
لما لقيت مراتي هي اللي واقفه قصادي ولقيتها بتقولي :-

” انا بقي لو مسكتك هعفريتك …………