حكايات العالم السفلى.. بقلم إيهاب همام

الحلقة العاشرة

أصوات غريبة

الفترة اللي كنت بقضيها في الأوضة بعد الشغل، كان المفروض انها تكون فترة راحة بعد ارهاق ساعات كتيرة في الشغل، لكن للاسف أصوات الصريخ اللي كنت بسمعها، والدم اللي كان بينزل من علي الحيطة بالليل، كان كفيل يحول حياتي لجحيم، انا بشتغل بمرتب ضعيف يا دوب بصرف بيه علي نفسي، ماعنديش رفاهية اني اسيب الأوضه، لحد ما بدأت أشيل ورق الحائط، واكتشفت ان في رموز وعلامات غريبة علي الحيطة، ومن بعدها بقيت حاسس ان حد معايا في المكان، بحس بنفسه، وانفعالاته، سواء فرحان أو مضايق.

الشجاعة خدتني في يوم وانا راجع من الشغل وقررت أروح وأكسر الحيطة اياها، ولما عملت كده لقيت في جثث مدفونه بهدومها ورا الحيطة.

بدأت أرجع لورا لحد ما اتكعبلت ووقعت علي ضهري ع السرير، فضلت باصص لسقف الأوضه، بحاول استوعب اللي بيحصل، وفجأة حسيت ان السقف بيقع عليا، ماكنتش قادر اتحرك، غمضت عيني جامد وسمعت صوت بيقولي….

ايه يا استاذ الأوضة عجبتك….
فتحت عيني، كنت واقف علي باب الاوضة وشنطتي جنبي، بلعت ريقي وقولتله معلش بس افتكرت حاجه مهمة كنت ناسيها وخدت نفسي وخلعت…