الإعلامية شيماء علام تكتب.. لا تخافوا ولكن إحذروا

نور بنت الإعلامى تامر أمين، تزوجت إبن الاعلامى عمرو الليثي ومحصلش نصيب فاتطلقوا بعد شهرين ….

واللى حصل أنه خطب ملك بنت الفنان أحمد زاهر .

تامر أمين ونور ناس فى منتهى الرقى والاحترام no comment منهم خالص زى أي أسرة محترمة.

تدخل أكونت نور تلاقي مفيش أي جديد نزل ليها، أخر حاجة فيديو مع بابها في مطعم السمك .

يقوموا مرتزقة السوشيال ميديا يسكتوا لحد كده ؟ لا

يدخلوا الأكونت ويجيبوا فيديوهات من الصيف اللى فات وينزلوها ويقولوا أنها بتلقح وهاتك يا شتيمة ومقارنات بين البنتين ومين أجمل ومين أدب و و و .

الفكرة بقى أن الموضوع مش بقى أخلاق مجتمع وتصرفات عشوائية و خلافة .

الفكرة ان بقى فى حروب الاكترونية ولجان موجهة ورأى عام كاذب لازم ناخد بالنا منه … انك تقعد على السوشيال ميديا مجرد متلقى أصبح خطاء بترتكبة فى حق نفسك وفى حق المجتمع.

لو قررت تساير الواقع وتنخرط فى العالم اللى كان موازى ولكن أصبح اساسى يبقى لازم تشغل عقلك ولا تبنى أي حقائق على استنتاجات.

ولو ناخد بالنا من يومين بالظبط كانت حادثة إلقاء أكياس المية على المصلين اللى تابع شاف رياح اللجان الإلكترونية وهى بتاخد الرأى العام يمين شوية وشمال شوية وكأنه راكب مرجيحة ولفى بينا يا دنيا.

دورنا كأفراد هو عدم الانسياق ورى سياسات اللجان الإلكترونية كى لا نصبح ك القطيع فلكل منا عقل وعقيدة وانتقاء المصادر الموثوقة اصبح فرض عليك كى تحمى نفسك قبل المجتمع فهناك رقيب وعتيد ربما أصبح مكانهم فى هذا العصر هو الكيبورد.

خلاصة القول الانسياق خلف لجان السوشيال ميديا هو آفة العصر

خلى رأيك غالي يتكون بصعوبة وميطلعش إلا فى الوقت المناسب

الموضوع أصبح خطر … لا تخافوا ولكن إحذروا.