حَريم.. بقلم ولاء شهاب

ومَالها ياسيدي يَعني الحَريم ؟!
دَ هما الونس والمحبة
وصُنع اللهِ العلي العَظيم…
حريم
دي كلمة كبيرة مايعرف لها مَعني إلا الكَريم ..
حريم
دي أختك وزوجتك وسر وجودك ولا يوم
تسيبك لما تشوفك مرة حَزين ..

حريم
شهامة ،جدعنا ، طيبة ،
صفات عارفها ومعتز بيها صعيدي أصيل…
وغير الصعيدي من وجه بحري رجولة وبردو
يقَدر ويعرف دور الحريم…
حريم
دى ميزة معاني لذيذة لا يمكن
لعَاقل يزَعَل حريم..

حريم
دي قيمة معاني عظيمة تشيل الجمِيلة
ترد عليها في وقت زنقة بمليون جمِيل …
حريم
دي سَكنك وأمْنك وصَاحبك
في ضَهرك تملي لو يوم تغيب..

حريم
دي نورك وضَلك ،
ضِله تضلل في يوم كله مَطره
تشيلك في عينها
و تغنيك ساعتها سُؤال اللئيم…
عرفت يا افندي معني الحَريم؟!

ولاء شهاب